Kalaşnikov şair olacaqmış

Kalaşnikov silahlarının yaradıcısı olan Mixail Kalaşnikova ad günündə “Rusiyanın qəhrəmanı” titulu verilib. Ötən gün Kreml Sarayında 90 illik yubiley törəninə qatılan silah yaradıcısına Rusiyanın prezidenti Dmitri Medvedev bu titulu ürəklə təqdim edib.
Çıxışı zamanı yubilyar çoxlarına məlum olmayan istedadını da nümayiş etdirib. O, deyib ki, uşaqlıqdan ən böyük arzusu şairlik olsa da, həyatı başqa yolla gedib.
BBC-də yer alan xəbərə görə, şeir yazan və kitab müəllifi olan Kalaşnikov qəzetçilərlə görüşü zamanı “Gəncliyimdə şeir yazırdım deyə, məni tanıyanlar şair olacağımı güman edirdi. Həyatımı fərqli yolla getdim. Indi çox pis şeirlər yazılır” deyib və öz şeirini oxuyub.
Rusiyanın ən böyük tituluna sahiblənən Kalaşnikovun çıxışı çox incə və romantik notlar üzərində qurulub: “Silahımın yanlış yerlərdə istifadə edilməsi mənim günahım deyil. Bu, politoloqların çatışmazlığından irəli gəlir. Mən bu silahı ölkəmi qorumaq üçün yaratdım”. Qeyd edək ki, “AK-47″ silahı ilk dəfə 1947-ci ildə yaradılıb.