2500 il öncə itmiş ordu tapıldı

Iki italiyalı arxeoloq – Angelo və Alfredo Kastiglioni qardaşları qədim dünya tarixinin ən müəmmalı sirlərindən birini açmağa müvəffəq olublar. 13 illik tədqiqatlardan sonra 2500 il öncə Qərbi Misir çöllərində yoxa çıxmış 50 min nəfərlik ordunun qalıqları aşkarlanıb.
Məlumata görə, Kastiglioni qardaşları miladdan öncə 525-ci ildə Misir çöllərində 50 min nəfərlik ordusu ilə birgə yoxa çıxmış Əhəməni imperatoru II Kambisin axtarışına başlayıb. 13 il davam edən tədqiqatlar nəticəsində toz fırtınasının altında qalmış böyük bir ordunun qalıqlarına rast gəlinir. Tədqiqat qrupunun gəldiyi qənatə əsasən, dünya tarixində ilk dəfə qədim yunan tarixçisi Heredotun əsərində bəhs olunan bir hadisənin qalıqları aşkarlanıb. Hazırda Əl-Kharga adlanan ərazidə aparılan axtarışlar zamanı yüzlərlə bronz silah, biləklik, müxtəlif döyüş ləvazimatları, habelə saysız-hesabsız insan sümüyü tapılıb. Heredotun yazdığına görə, Əhəmənilər Imperiyasının banisi böyük Kirin oğlu Kambis Misiri itaətə çağırıb. Lakin rədd cavabı aldıqdan sonra 50 min nəfərlik ordu ilə bu ölkənin üzərinə yürüşə çıxıb. Tarixçi yazır ki, Kambis və ordusu böyük səhralıqla 7 gün irəlilədikdən sonra indiki araşdırmaçıların Əl-Kharga adlandırdıqları əraziyə çatıb və oradan müəmmalı şəkildə yoxa çıxıb.